छत्रपती संभाजीनगर,(सांजवार्ता ब्युरो) ः सिगारेटच्या किरकोळ कारणावरून झालेल्या वादात एका अल्पवयीन मुलाने इसमावर चाकूने सपासप वार केले. या भयंकर हल्लयात सदर इसम जागीच ठार झाला. ही धक्कादायक घटना बुधवारी (दि. ८) रात्री नऊ ते सव्वा नऊ वाजेच्या सुमारास मुकुंदवाडी रेल्वे पटरीपलीकडील राजनगरात घडली. याप्रकरणी अल्पवयीन आरोपीवर मुकुंदवाडी पोलिस ठाण्यात गुन्हा दाखल करण्यात आला असून आरोपीला अटक केल्याची माहिती पोलिस निरीक्षक विवेक सोनवणे यांनी दिली.

रोहिदास दत्तू खकाळ रा. राजनगर छत्रपतीनगर मुकुंदवाडी असे मयत इसमाचे नाव आहे. याप्रकरणी मयताची पत्नी राणी रोहिदास खकाळ (वय ५०) यांनी फिर्याद दिली. फिर्यादीनुसार फिर्यादी पतीसह राजनगर येथे राहतात व दोघेही पती पत्नी मजूरी करतात. बुधवारी (दि.८) रात्री सव्वा नऊ ते साडे नऊ वाजेच्या सुमारास १५ वर्ष ३ महिने वयाचा ओळखीचा अल्पवयीन आरोपी याने दार वाजविले. फिर्यादींचे पती घरात झोपलेले होते. फिर्यादींनी दार उघडताच अल्पवयीन आरोपी घरात आला.  जुन्या भांडणाच्या  व सिगारेट ओढण्याच्या कारणावरून आरोपीने अचानक पतीवर हल्ला चढवला. पोटात आणि पाठीत चाकूने वार केल्यामुळे पती रक्ताच्या थारोळ्यात पडले.